Policia e Bulqizës ka vënë nën hetim tre persona për incidentin tragjik të regjistruar ditën e djeshme në minierën e kromit, ku pas shembjes të një masivi dheu humbi jetën minatori 53-vjeçar Zini Murati, të cilion e zuri poshtë.
Më konkretisht, autoritetet policore raportojnë se janë proceduar penalisht në gjendje të lirë shtetasit H.D., 64 vjeç, me detyrë drejtues teknik; A.A., 69 vjeç, me detyrë përgjegjës teknik, të dy banues në Tiranë, dhe M.S., 53 vjeç, me detyrë. brigadier, banues në Bulqizë.
Viktima ishte në punë në një nga minierat e kompanisë “Çupi Grup”, drejtuar nga Arben Çupi, i cili gjithashtu është kryetar i Këshillit Bashkiak në Bulqizë nga radhët e Partisë Socialiste.
Vdekja e minatorit Zini Muratit shënon aksidentin e dytë fatal brenda një periudhe të shkurtër në këtë sektor. Disa ditë më parë, një 29-vjeçar, Armond Peshku humbi jetën në një galeri kromi në Martanesh, ndërsa 40-vjeçari Hajdar Bala mbeti i plagosur.
