Është shtyrë sërish seanca paraprake në Gjykatën e Posaçme për ish-ministrin e Shëndetësisë, Ilir Beqaj, ish-zv.ministrin Klodian Rjepaj, biznesmenin Ilir Rrapaj dhe 6 të pandehurit e tjerë për dosjen e koncesionit të sterilizimit.
Shkak për shtyrjen e seancës është bërë mungesa e avokatit Klodian Skënderi në seancën gjyqësore. Kujtojmë se edhe seanca e datës 13 Maj u shty për shkak të mosnjohjes së të pandehurve me të gjitha aktet e dosjes hetimore.
Seanca e radhës pritet të mbahet më datë 10 Qershor, në orën 09:00.
Më 30 Mars të këtij viti, SPAK mbylli hetimet për dosjen e koncesionit të “Sterilizimit”, ku ndaj ish-ministrit të Shëndetësisë Ilir Beqaj, u ngrit akuza për veprën penale të “shpërdorimit të detyrës”, lidhur me procedurat e dhënies së koncesionit me vlerë 100 milionë Euro, në vitin 2015.
Nga hetimet ka rezultuar se ish-ministri nuk ka evituar konfliktin e interesit me biznesmenin Ilir Rrapaj, fituesin e koncesionit me vlerë 100 milionë Euro dhe nuk ka kërkuar studim të detajuar për nevojat e sterilizimit në mënyrë që të zgjidhte një variant më pak të kushtueshëm.
