Tashmë gjithçka është zyrtare, Enzo Maresca është trajneri i ri i Chelsea-t.
Italiani ka vendosur të mbyllë aventurën e tij me Leicester, të cilët i riktheu në Premier League, për të nisur një të re me “Blutë e Londrës”.
Zyrtarizimi ka ardhur nga vetë klubi londinez të cilët krah fotos së Marescas, shkruajnë: “Mirësevjen te Chelsea, Enzo Maresca!”. Ai ka nënshkruar një kontratë 5-vjeçare me opsion rinovimi deri në qershor të 2030-ës.
Tekniku 44-vjeçar ka një karrierë të gjatë në profesionin e trajnerit. Më parë Maresca ka qenë ndihmës trajner te Ascoli në Itali, e më pas te Sevilla, dhe West Ham. Në vitin 2020, Maresca debutoi si trajner i parë duke marrë drejtimin e Manchester City-t U23.
1 vit më vonë, italiani u kthye në vendlindje aty ku mori përsipër punën e trajnerit te Parma, por aventura zgjati vetëm 7 muaj. Maresca u rikthye në Premier League ku mori rolin e ndihmësit të Pep Guardiolas te City. Teksa sezonin e fundit, trajneri 44-vjeçar e mbylli me Leicester, klub të cilin e riktheu në elitën e futbollit anglez.
Tashmë, për trajnerin italian nis një aventurë e re tepër e vështirë, pasi i duhet të “rindërtojë” nga themelet një Chelsea të lënë përgjysë nga i larguari Mauricio Pochettino.
