Real Madrid ka fituar për herë të 15-të në histori trofeun e Champions League.
Në finalen e madhe, të “Wembley” në Londër spanjollët ia arritën të mundin me rezultatin e pastër 2-0, Borussia Dortmund.
Dominues total të të sfidës ishin gjermanët, mirëpo një super Thiabout Courtois, ndali çdo rast të “verdhezinjve”, derisa Carvajal e Vinicius Junior lëshuan kundërpërgjigjen spanjolle, me dy golat e tyre në fundin e pjesës së dytë e më konkretisht në minutat 74’ e 83’, për të “vulosur” gjithçka.
Në minutën e 21-të, verdhezinjtë iu afruan ndjeshëm golit, Adeyemi kishte shansin e artë të realizonte, por gaboi para portierit, edhe pse dribloi Courtois-n. 2 minuta më pas, Fullkrug u ndal vetëm nga shtylla. Të besuarit e Ancelottit e patën të vështirë të dilnin përpara, teksa hasën në murin verdhezi.
Pjesa e dytë filloi “zjarr” për Realin, Kroos vendosi në provë portierin Kobel me një goditje dënimi, e menjëhershme përgjigjja e “gardianit”.
Për të ardhur te goli, gjithçka nis nga një goditje këndi, Carvajal u hodh mbi të gjithë, për të dërguar topin në rrjetë. Pas shënimit të golit, spanjollët morën zemër dhe ngulmuan edhe për të dytin.
Goli i sigurisë mban firmën e Vincius në të 83-tën. Menjëherë pas vërshëllimës finale të arbitrit slloven Vincic, “shpërtheu” festa në stadium por jo vetëm, Real Madrid ngjitet kështu në majën e Europës.
Gëzim i madh për Kroos, natë magjike për të, në ndeshjen e fundit me fanellën e Los Blancos. Real Madrid kompleton kështu një sezon pothuajse perfekt, pasi ka fituar edhe kampionatin.
Në krahun tjetër, Dortmund meriton duartriktje për atë që dha këtë edicion, e natyrisht duhet të provojë përsëri.
