Korça i jep lamtumirën poetit të njohur Skënder Rusi i cili u nda nga jeta në moshën 72 vjeçare.
Homazhet janë mbajtur në hollin e teatrit “Andon Zako Çajupi” në Korçë.
“Nuk di çfarë të them, ishte i jashtëzakonshëm, jam shumë e shqetësuar. Punonim bashkë, kishe poezi të mrekullueshme”, u shpreh një mikja e tij.
“Skënder Rusi ishte një mik shumë i veçantë, një poet i madh, një njeri me shpirt shumë të madh, human”, tha një tjetër mik i tij.
Entela Kasi, organizatore e netëve të poezisë korçare e ka patur të vështirë të thotë shumëçka për mikun e saj, ndërsa miku i poetit Vangjush Mile është ndalur gjatë tek madhështia e poezive të Skënderit, në veçanti tek ajo; “Korçës, një fjalë dashurie”.
Kush është Skënder Rusi
Skënder Rusi u lind më 1952 në Korçë dhe ka mbaruar studimet e larta për Gjuhë-letërsi. Në vitin 1984 është diplomuar për dramaturgji dhe në vitin 1998 për drejtues biblioteke në Kajro.
Ka botuar 8 libra me poezi dhe dy nga dramat e tij janë vënë në skenë nga trupa e teatrit “A. Z. Çajupi”. Krijime të tij janë përfshirë nëpër antologjitë e disa vendeve të Evropës si në Gjermani, Zvicër, Maqedoni, Kosovë, Greqi etj.
Prej 12 vjetësh ka qenë kryetar i Klubit të Shkrimtarëve “Bota e Re” në Korçë.
Prej 7 vjetësh organizoi dhe drejtoi aktivitetin më të madh kulturor në Korçë: “Netët korçare të poezisë” me poetë të ftuar nga Kosova, Greqia, Maqedonia, Turqia, Bullgaria, Rumania, Italia etj.
Në 2021-shin, Rusi u vlerësua me titullin “Qytetar Nderi” i Korçës.
