Pavarësisht se pronarët “de fakto” të kompanisë, drejtorët e Bashkisë janë në burg, kryebashkiaku Erion Veliaj vazhdon t’i japë lekë nga buxheti i Bashkisë së Tiranës kompanisë “5D”.
Ish-deputeti Belind Këlliçi ka denoncuar në emisionin “Të Paekspozuarit” skandalin e radhës duke zbuluar dokumentet për pagesat që vijojnë për kompaninë “5D”. Bëhet fjalë për një tender të fituar nga kompania “5D” për korsi biçikletash në zonën e Liqenit të Thatë në vitin 2021 dhe që duhej të ishte mbaruar në 2022, por nuk është bërë asnjë punë.
Ndërkohë, dy ditë më parë, Bashkia e Tiranës i ka akroduar fond shtesë kompanisë “5D” për këtë tender.
“Është në projekt i fituar nga 5D në 2021, 587 mijë euro për një pedonale dhe pistë buiçikletash dhe duhet të kishte mbaruar në maj 2022. Kompania “5D” është paguar mbi 50 për qind të shumës totale, mbi 307 mijë euro. Nga bashkia e Tiranës janë bërë dy pagesa më 28 maj 2024 për ndërtim pedonale, korsi biçiklete. Duke qenë se kjo kompania nuk është sekuestruar, pardje, ndërkohë që ne ishim në protestën e 9-të janë paguar mijëra euro për këtë projekt që nuk ekziston. Më 28 maj janë likuiduar dy fatura” – tha Belind Këlliçi.
Sipas Këlliçit, problemi qëndron tek SPAK, që nuk ka vënë sekuestro ndaj kompanisë “5D” edhe pse ka prej dy muajsh që i bën thirrje për këtë gjë.
