Policia e Tiranës ka vënë në dispozicion 20 mijë euro shpërblim për këdo që jep informacion për kapjen e autorëve që dhunuan barbarisht avokatin Sokol Mëngjesi, mëngjesin e kësaj të enjte në zonën e ish-Bllokut në Tiranë.
“Drejtoria Vendore e Policisë Tiranë, kërkon ndihmën e publikut për lokalizimin dhe kapjen e autorëve dhe për çdo informacion të vlefshëm që do të çojë në kapjen e autorëve vë në dispozicion shumën prej 20 000 Euro, informacioni mund të jepet në numrin telefonik pa pagesë 112 si dhe në numrin celular +355694111546 (Informacioni mund të jepet në telefon ose WhatsAapp).” – tha drejtori i Policisë së Tiranës, Tonin Vocaj gjatë deklaratës për mediat.
Në kërkim vazhdojnë të mbeten tre autorë, teksa njëri prej tyre u vetëdorëzua në Polici. Më konkretisht, në kërkim janë shtetasit Drivald Alia, 21 vjeç; Elton Kasaj, 33 vjeç dhe Romario Tabaku, 26 vjeç, të tre banues në Tiranë. Ndërsa u vetëdorëzua shtetasi Dorian Alia, 32 vjeç
Sipas Policisë të Tiranës, agresorët e dhunimit të avokatit janë shtetasit Dorian Alia, Drivald Alia dhe Elton Kasaj, ndërsa Romaroi Tabaku i ka ndihmuar për t’i larguar pas krimit me automjetin tip “Audi”.
Nga hetimet ka rezultuar se avokati Sokol Mëngjesi është dhunuar për shkak të detyrës, ndërsa si organizator është ndaluar shtetasi Dritan Jani Nano 58 vjeç.
“Nga veprimet hetimore rezulton se i dëmtuari Sokol Mëngjesi me profesion avokat, është goditur për shkak të dëtyrës. Po nga veprimet hetimore rezulton se avokati ka përfaqësuar ligjërisht në një proces civil në shkallë të parë dhe në apel një familje e cila kishte të trashëguar një pronë në qytetin e Tiranës, proces i cili është fituar nga pala e përfaqësuar prej tij. Disa nga trashëgimtarët nuk kanë pranuar të plotësojnë kushtet ligjore të kontratës së nënshkruar me Studion Ligjore “ALTERUM SHPK”.
Po në vijim të veprimeve hetimore dhe procedurale është shoqëruar shtetasi Dritan Jani Nano, 58 vjeç, banues në Tiranë, i cili u ndalua me iniciativë i dyshurar si organizator i kësaj ngjarjeje të rëndë kriminale.
Materialet do ti kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprën penale “Vrasja e funksionarëve publik”, mbetur në tentativë, parashikuar nga nenet 79/a dhe 22 të Kodit penal.” – tha Tonin Vocaj.
