Një ngjarje e rëndë ka ndodhur mëngjesin e së hënës në Tiranë.
Sipas informacioneve të para të policisë, një punëtor i moshës 53-vjeçare ka gjetur vdekjen e menjëhershme pasi ka rënë nga një pallat në ndërtim e sipër.
“Më datë 27.05.2024, rreth orës 08:20, në rrugën “Aleksandër Mojsiu”, në një pallat në ndërtim e sipër, duke punuar ka rënë nga lartësia shtetasi A. F., 53 vjeç, i cili si pasojë e dëmtimeve të marra ka humbur jetën”, njofton policia.
Grupi hetimor po punon për sqarimin e rrethanave të ngjarjes.
Së fundmi janë shtuar rastet ku punëtorët e pallateve gjejnë vdekjen pasi rrëzohen për shkak se punojnë në kushte jo të sigurta. Pas dy rasteve në Lezhë, ky është aksidenti i tretë me vdekje në punë që ndodh brenda muajit maj.
