Ylli i Real Madrid, Jude Bellingham, është shprehur mjaft i emocionuar përpara finales së Ligës së Kampioneve në “Wembley”, ku përballë ka ish-skuadrën e tij, Borussia Dortmund.
Talenti anglez ka fituar tashmë titullin e tij të parë me “Los Blancos”, dhe pas kampionatit ai është i uritur për më shumë.
Bellingham është përshtatur menjëherë në Spanjë që kur u bashkua nga Borussia Dortmund verën e kaluar dhe tani do të përballet me ish-skuadrën e tij.
20-vjeçari ka shënuar 23 gola dhe ka dhënë 12 asistime në të gjitha kompeticionet këtë sezon dhe shpreson që formën e jashtëzakonshme ta vijojë në finalen e Ligës së Kampionëve dhe më pas në Europian.
Duke folur para finales së 1 qershorit, Bellingham tha: “Është shumë e veçantë për mua të luaj këtë ndeshje, por më duhet t’i vendos emocionet në një anë.
Ka qenë një sezon i parë i mrekullueshëm, të gjithë më kanë pritur shumë mirë. Është e rëndësishme që ne jemi në maksimumin tonë. Është e vështirë për skuadrat e tjera kur luajmë në atë nivel.
“Stafi ynë po analizon gjithçka në mënyrë që ne të fitojmë, unë kam 100% besim tek ata. Për të luajtur këtë lloj ndeshje është arsyeja pse jam këtu. Gjithmonë kam ëndërruar të luaj për këtë ekip dhe të shënoj gola. Kjo skuadër nënkupton Ligën e Kampionëve, kjo është ajo që ata duan gjithmonë. Dua të bëj pak histori me këtë ekip.”
Nëse fitojnë, Reali do të shënonte titullin e tyre të 15-të të Ligës së Kampionëve, duke thelluar dominancën në arenën europiane.
