Trajneri i Egnatias, Edlir Tetova nuk mund të ishte më i lumtur se kaq pasi arriti të fitonte të dy trofetë këtë sezon.
Trajneri durrsak, foli pas fitimit të titullit kampion me Egnatian ku mposhtën Partizanin në Air Albania.
Tekniku i rrogozhinasve u shpreh se ekipi i tij arriti objektivat e sezonit pikërisht triumfi në Kupë dhe kampionat.
41-vjeçari foli edhe për merkaton e Egnatias teksa konfirmoi largimin e Fernandos nga skuadra.
“Të dyja trofetë jo me thënë atë që është, por kur u mundëm me Tiranën vjet deklarova se këtë sezon do të ishim më mirë dhe gjatë ecurisë kur bëmë mirë thamë pse mos ti tentonim të dyja trofetë.
Në pjesën e parë e markuam mirë Mbanë dhe aty erdhi dhe goli. Unë e pata deklaruar që është lojë episodesh edhe ne e kishim mundësine, goditëm shtyllën, ishim më pranë golit.
Ka qenë një konstatim i mirë, fitova duelet në mesfushë, e menaxhuam mirë, por edhe Partizani kishte momentet e veta. Fitoren ja dedikoj familjes time dhe Edmond Zallës, kam mirënjohje pafund për atë njeri.
Mbas dy ditësh nisem me pushim dhe do kemi 1 javë pushime. Ikën vetëm Fernando nga skuadra, kemi dy oferta për dy lojtarë, por qëndrojmë me këmbë në tokë”, deklaroi Tetova për “MCN TV”.
