Kjo e shtunë ka regjistruar disa aksidente për shkak të motit të keq dhe manovrave të gabuara e fatkeqësisht i ka marrë jetën një 40-vjeçari.
8 persona raportohet se janë plagosur nga këto aksidente. Fatmirësisht të plagosurit ndodhen jashtë rrezikut për jetën në spital.
- Aksident me vdekje në Tiranë, i riu përplasi 40-vjeçarin, ndërron jetë në spital
Një aksident me pasojë vdekjen e një personi është regjistruar mbrëmjen e sotme në Tiranë. Një 21-vjeçar ka aksidentuar me mjetin e tij një 40-vjeçar, i cili si pasojë e dëmtimeve të marra ka ndërruar jetë në spital.
“Më datë 25.05.2024, rreth orës 21:30, në Sauk, mjeti me drejtues shtetasin A. K., 21 vjeç, ka aksidentuar shtetasin H. A., 40 vjeç, i cili si pasojë e dëmtimeve të marra ka ndërruar jetë në spital.”- njofton policia.
- Aksident i 4-fishtë në Durrës, 7 të plagosur
Një aksident i 4-fishtë ka ndodhur në Plepa të Durrësit pasditen e sotme ku kanë mbetur të plagosur 7 persona.
“Rreth orës 20:10, në lagjen nr. 13 Durrës, në aksin rrugor Plepa-Kavajë, janë përplasur 4 automjete me drejtues shtetasit A. D., G. L., E. M., dhe E. H.
Si pasojë e përplasjes kanë shkuar për kontroll mjekësor në spitalin rajonal në Durrës, 6 shtetas pa probleme për jetën, ndërsa shtetasja Xh. H., 61 vjeçe është transportuar në Spitalin e Traumës në Tiranë, jashtë rrezikut për jetën.”- njofton policia.
Ende nuk dihen shkaqet e aksidentit.
- Aksident në Korçë, përplasen dy makina, plagoset një grua
Një aksident ka ndodhur pak minuta më parë në qytetin e Korçës. Dy makina janë përplasur me njëra-tjetrën në rrethana ende të paqarta e si pasojë ka mbetur e plagosur një grua, që ndodhej në njërën nga mjetet. Kjo e fundit është nisur drejt spitalit të Korçës për ndihmë mjekësore.
Dyshohet se shkak për aksidentin është bërë lagështia në rrugë dhe një manovër e gabuar.
- Aksident në Librazhd-Përrenjas, furgoni përmbyset në mes të rrugës
Një aksident është regjistruar pasditen e sotme në aksin rrugor Librazhd-Përrenjas, pranë fshatit Qukës. Një automjet tip furgon ka dalë nga rruga dhe është përmbysur anës aksit.
Nuk raportohet për persona të lënduar, ndërsa nga përplasja është dëmtuar pjesërisht furgoni.
Paraprakisht dyshohet se aksidenti ka ndodhur për shkak të motit të keq dhe lagështisë në rrugë.
Në furgon ishte duke udhëtuar vetëm shoferi i cili fatmirësisht ka arritur të dalë pa dëmtime serioze.
- Dëmet që shkaktoi moti i keq
Po ashtu, për shkak të motit të keq që përfshiu vendin këtë pasdite, fasada e një pallati në Tiranë është dëmtuar. Mësohet se disa pllaka janë shkëputur nga kati i fundit i një pallati 7-katësh.
Ngjarja ka ndodhur në rrugën “Kongresi i Manastirit” përballë shkollës “Çajupi”.
Fatmirësisht nuk ka persona të lënduar.
Për shkak të motit të keq, dhjetëra automjete kanë mbetur në trafik pasditen e sotme, në Rrugën e Arbërit, pasi një automjet tip furgon nuk ka arritur të ngjisë by passin duke bërë kështu edhe bllokimin e mjeteve të tjera.
Kamioni është bllokuar për shkak të motit të keq me reshje shiu që pushtoi vendin këtë pasdite.
Moti i keq shkaktoi problematika edhe në Elbasan. Reshjet e dendura kanë krijuar vështirësi në qarkullimin e mjeteve kryesisht në aksin rrugor nga Bradasheshi që të çon në hyrje të qytetit, por edhe në drejtim të autostradës Elbasan-Tiranë. Uji ka vërshuar në rrugë, duke shkaktuar edhe vështirësi në qarkullimin e makinave.
Banorët e Elbasanit raportuan se për shkak të madhësisë së kokrrës së breshërit, disa automjete janë dëmtuar.
Si pasojë e reshjeve është rënduar trafiku edhe në kryeqytet, ndërsa u raportuan problematika në disa akse.
