Agjencia e Mbikëqyrjes Policore ka goditur një grup kriminal, i dyshuar për kryerjen e veprës penale “Prodhim dhe shitje e narkotikëve”, veprimtari të cilën dyshohet se e kryenin në ambientet e një bar kafe, në Patos.
Si rezultat janë arrestuar katër persona dhe janë proceduar penalisht dy të tjerë. Mes personave të vënë në pranga është edhe efektivi i Policisë, Lorenc Gropa, me detyrë Trup Shërbimi i Patrullës së Përgjithshme pranë Komisariatit Fier.
Gjithashtu, janë arrestuar edhe shtetasit Klevis Gropa, Ledjon Gropa dhe Skerdilajd Levendi, ndërsa janë proceduar penalisht shtetasit Maliq Gropa dhe Bruno Festimaj.
AMP raporton se nga kontrolli i banesës së punonjësit të policisë Lorenc Gropa janë gjetur një qese me kokainë me peshë rreth 41,25 gr, 2 cigare me lëndë narkotike hashash, 2 peshore për peshimin e lëndës narkotike, një armë zjarri tip TT, një armë zjarri e llojit Karabinë dhe 11 aparate celularë.
Bëhet me dije se nga veprimet hetimore në vijimësi si deklarimet dhe këqyrja e telefonave, u dokumentua implikimi në trafikun e armëve në shtetin grek të shtetasit Skerdilajd Levendi, i cili u arrestua për “Trafikim i armëve dhe municioneve”, pasi ai negocionte me shtetas të tjerë në lidhje me këtë veprimtari të paligjshme.
Ndërsa, Bruno Festimaj është proceduar penalisht, pasi është i dyshuar për “Organizim i lojërave të palejuara” dhe “Vënia në dispozicion e ambjenteve për lojëra të palejuara”. Gjitashtu, është proceduar edhe Maliq Gropa, i dyshuar për “Prodhim dhe mbajtja pa leje e armëve të gjuetisë dhe sportive”.
AMP raporton se vijojnë hetimet për përfshirjen e mundshme të shtetasve apo punonjësve të tjerë të policisë në këtë veprimtari të paligjshme.
