Detaje të reja janë zbardhur nga aksidenti në autostradën Rrogozhinë-Lushnje, ku një automjet humbi kontrollin dhe përfundoi në oborrin e një shtëpie. Ngjarja ndodhi mbrëmë në fshatin Konjat.
Mjeti tip ‘Ford’ me targa AA 750 UE, ka marrë me vete jashtë rrugës barrierat e hekurta dhe ka përfunduar në oborrin e një banesës në anë të autostradës.
Drejtuesi i mjetit është larguar nga vendi i aksidentit. Policia nëpërmjet targës ka identifikuar pronarin e mjetit dhe po punon për gjetjen e tij.
Dyshohet se mjeti ka dalë nga rruga, për shkak të shpejtësisë tepër të lartë.
Kujtojmë se disa vite më parë, një e moshuar në shtëpinë ngjitur gjeti vdekjen, pasi një makinë përfundoi në oborrin e shtëpisë duke i rënë sipër.
