Federata Angleze ka nisur procedimin disiplinor kundër futbollistit brazilian të West Ham, Lucas Paquetá, duke vënë në dyshim një transferim të mundshëm të tij te Manchester City gjatë verës.
Braziliani, i cili kishte shkëlqyer në klubin anglez pas një eksperience jo edhe aq të lumtur te Milani, dyshohet për shkelje të rregulloreve të basteve, sidomos sa u përket disa kartonëve të verdhë që ai ka marrë gjatë viteve 2022 dhe 2023.
Ka pasur lëvizje të çuditshme të koeficienteve të basteve dhe shumave që janë vënë për ndëshkimin e brazilianit gjatë ndeshjeve të veçanta dhe në katër raste, është identifikuar edhe vendosja e këtyre shumave në vendlindjen e tij, në ishullin Paketa në bregdetin e Rio De Zhaneiros.
City e shihte Paquetá, si një zëvendësim potencial të Bernardo Silvas nëse largohet gjatë verës, por me çështjen që është hapur tashmë kundër brazilianit, duket e vështirë që Pep Guardiola të japë dritën e gjelbër për futbollistin.
