Është zbardhur emri i shqiptarit që u arrestua nga autoritetet policore greke, teksa ishte arratisur nga burgu që prej vitit 2011 dhe konsiderohej me rrezikshmëri të lartë, pasi rezultonte me 3 urdhër arreste dhe 3 dënime nga autoritetet greke.
Mediat raportojnë se në pranga është vënë shtetasi Aleksandër Marku, 48 vjeç, i cili ishte arratisur nga burgu Malandrinos në vitin 2011, prej të cilit kishte marrë leje 9 ditore dhe duhej të kthehej sërish në qeli më 6 Maj të vitit 2011, por që nuk ishte kthyer më.
Policia greke kishte siguruara informacione se shqiptari Aleksandër Marku banonte në zonën e gjerë të Atikës Perëndimore, së bashku me familjen e tij dhe më pas kreu operacionin për arrestimin e tij.
Shqiptari ishte dënuar në 24 Qershor të vitit 2009, nga Gjykata e Apelit Athinë, me një dënim total prej 22 vjet e 9 muaj burgim, për veprën penale “Vjedhja në bashkëpunim”.
Gjithashtu ai rezulton i dënuar nga Gjykata e 2-të Pesëanëtarëshe e Apelit Athinë në 27 Prill të vitit 2012, me 14 vite burgim, për veprat penale “Rastet e veçanta të vjedhjes, të kryera dhe në tentivë” dhe “Bashkëpunim në pastrim parash nga veprimtaria kriminale” si dhe i dënuar edhe nga Gjykata Njëanëtarëshe e Athinës në vitin 2017 me 19 muaj burg për “plagosje e rëndë në bashkëpunim, “armëmbajtje pa leje”, “përdorim i armëve” dhe “të shtëna pa arsye”.
Gjithashtu ndaj tij ka tre urdhër arreste nga Prokuroria e Athinës në 2014 dhe 2015 për “grabitje” dhe nga Prokuroria e Pireut në 2015 për “grabitje në bashkëpunim”.
Mediat raportojnë se shqiptari është arrestuar në orët e mëngjesit të ditës së shtunë, në Elefsina, në Sheshin e Rezistencës Kombëtare, Athinë. Gjatë ndalimit ai ka paraqitur dokumente ligjore, me të dhëna identifikimi nën emrin Ernesto Nesto, 48 vjeç.
Nga policia greke po shqyrtohet vërtetësia e këtyre dokumenteve që disponon i arrestuari, ndërkohë që pritet edhe komunikim me autoritetet shqiptare për verifikimin e gjeneraliteteve të tij.
Sipas policisë greke, Aleksandër Marku nuk ushtronte asnjë veprimtari profesionale dhe siguronte jetesën ekskluzivisht nga përfitimi financiar i paligjshëm që përfitonte nga veprimtaria e tij kriminale.
Pas arratisjes nga burgu, ai ka vazhduar me intensitet më të madh veprimtarinë e tij kriminale, qoftë i vetëm apo në bashkëpunim me bashkatdhetarë të tij, duke zhvilluar veprimtari të larmishme.
Nga dokumentet e procedimit dhe dosja policore, rezulton se Marku ishte anëtarësuar në një organizatë kriminale të strukturuar dhe aktive në vazhdimësi, e përbërë nga të paktën shqiptarë të tjerë, të cilët kryen krimet e grabitjes, tentativës për vrasje dhe rastet e dalluara të vjedhjeve, me përbërje të ndryshme çdo herë, në rajone të ndryshme të Athinës. Për të arritur qëllimin e tyre, ata kishin blerë armë, kapele, doreza dhe mjete për vjedhje.
Sipas policisë greke, Aleksandër Marku është person veçanërisht i dhunshëm me sjellje antisociale dhe gjatë kryerjes së veprave të tij kriminale ka shfaqur mizori dhe sjellje të veçantë brutale ndaj viktimave të tij dhe paraqet rrezik për sigurinë publike dhe kohezionin social.
Aleksandër Marku dyshohet se ka qëndruar për pak kohë edhe në Shqipëri, ku ka ndërruar emrin dhe është kthyer në Greqi, duke vazhduar aktivitetin kriminal.
