Policia e Tiranës ka zbuluar një parcelë me kanabis në fshatin Pllanë, teksa në një banesë është zbuluar dhe një arsenal armësh dhe sasi lëndësh eksplozivi, ku si rezultat janë arrestuar dy persona dhe një tjetër është shpallur në kërkim.
Në kuadër të operacionit policor të koduar “Plani” janë vënë në pranga shtetasi V. J., 66 vjeç dhe T. T., 32 vjeç, banues në Zall-Bastar, ndërsa në kërkim ♪7shtë shpallur shtetasi A. K., 41 vjeç.
“Këta shtetas dyshohet se, në bashkëpunim me njëri-tjetrin, kanë kultivuar bimë narkotike në një parcelë në pyllin e fshatit Pllan. Gjatë kontrollit në këtë parcelë, shërbimet e Policisë gjetën dhe sekuestruan në cilësinë e provës materiale, bimë të dyshuara narkotike kanabis. Në vijim të veprimeve, gjatë kontrollit të banesës së shtetasit V. J., shërbimet e Policisë gjetën dhe sekuestruan 4 armë (1 çifte, 3 armë zjarri karabinë), 4 kallëpë me lëndë të dyshuar eksplozive, 18 krëhëra automatiku, sasi municioni luftarak, 2 kundërgaze, 2 thika, 2 aparate celulare, dhe shuma parash.” – thuhet në njoftimin e Policisë.
Materialet procedurale i kaluan Prokurorisë.
