Egnatia ka mundur 1-0 Kukësin në finalen e Kupës së Shqipërisë duke përsëritur suksesin e sezonit të kaluar.
Minuta e 38-të ishte vendimtare në këtë takim teksa ish-i i verlindorëve, Edison Ndreca arriti të shënonte dhe t’i jepte epërsinë dhe për rrjedhojë trofeun Egnatias.
Me suksesin e Egnatias në Kupë përfiton edhe Tirana, që do jetë një nga ekipet pjesëmarrëse në fazën eliminatore të Conference League. Bardheblutë bënin tifo për rrogozhinasit ndërsa fitorja e Kukësit do t’i nxirrte ata jashtë loje.
Egnatia, e renditur e para në sezonin e rregullt e kishte të sigurt vendin në Evropë, ndërsa tani suksesi në Kupë i hap rrugë një tjetër ekipi.
Në mungesë të Skënderbeut (vendi 4 në Final Four) të dënuar nga UEFA me dhjetë vite pezullim nga Evropa, është Tirana që merr një vend në Evropë edhe pse u rendit në vendin e pestë në Superligë.
Falë këtij verdikti kanë të sigurt 325 mijë euro nga pjesmarrja Europiane, teksa kjo shifër mund të dyfishohet në varësi të ecurisë në Europë.
