Policia e Shkodrës ka ndërmarrë një operacion anti-drogë, ku kanë sekuestruar 65.5 kilogramë marijuanë të përpunuar në formë çokollate, si dhe 31.5 kilogramë kanabis në formë boçe dhe një sasi municioni luftarak.
Operacioni është ndërmarrë pas informacioneve të siguruara nga Policia e Shkodrës për një tentativë për trafikim të një sasie të konsiderueshme droge.
Autoritetet raportojnë se blutë e Shkodrës, strukturat Operacionale dhe ato Shqiponja kanë ndërhyrë në lagjen “Skënderbeg”, ku në një ambient të përshtatur me tunel për të fshehur lëndën narkotike dhe gjatë kontrollit në tunel kanë gjetur dhe sekuestruar 65.5 kilogramë marijuanë të përpunuar në formë çokollate.
Gjithashtu, në vijim të operacionit në brendësi të një automejti tip furgon të parkuar në afërsi të këtij ambienti, u gjetën dhe 31.5 kilogramë kanabis në formë boçe dhe një sasi municioni luftarak.
Si rezultat i këtij operacioni nuk u arrit të arrestohej asnjë person, por Policia raporton se ka shpallur në kërkim dy të dyshuarit.
“Në momentin e ndërhyrjes nuk janë kosntatuar personat e dyshuar por nga hetimet paraprake është bërë shpallja në kërkim e dy shtetasve si autorë të dyshuar të këtij rasti dhe konkretisht shtetasit N. M., 42 vjeç dhe B. M., 37 vjec, lindur në fshatin “Ura e Shtrenjtë” dhe banues në Shkodër, për të cilët vijon puna për kapjen e tyre.” – thuhet në njoftimin e Policisë.
Sipas autoriteteve, nga hetimet rezulton se këta dy shtetas në bashkëpunim me njëri-tjetrin dhe një grup personash të tjerë dyshohet se janë implikuar në aktivitetin kriminal të prodhimit dhe shitjes së kanabisit në qarkun e Shkodrës.
Policia e Shkodrës pati një apel edhe për qytetarët e këtij rasti për të denoncuar çdo konstatim të aktiviteteve të grupeve kriminale në këtë zonë.
“Duke përfituar nga rasti dua ti drejtohem qytetarëve që duan dhe zbatojnë ligjin, që duan që fëmijët e tyre të jenë të sigurtë në rrugë, në shkollë dhe të mos kërcënohen nga rreziku i përdorimit të lëndëve narkotike apo të përfshirjes në shpërndarje të lëndëve narkotike:
Besoni dhe bashkëpunoni më shumë me Policinë e Shtetit, ne jemi në shërbimin tuaj dhe të zbatimit të ligjit, ndihma e mbështetja juaj e bën më të lehtë përmbushjen e misionit tonë.
Denonconi çdo rast të paligjshmërisë në cilëndo fushë që ajo shfaqet dhe konstatohet nga ana juaj.
Një thirrje dhe apel edhe për ata banorë që gënjehen nga persona apo grupe kriminale duke rënë pre e tyre për tu përfshirë në aktivitetin kriminal të kultivimit, prodhimit dhe shitjes së lëndëve narkotike, që të tregohen të kujdesshëm dhe të denoncojnë çdo indicje për ushtrim të kësaj veprimtarie kriminale.” – u tha gjatë konferencës për shtyp.
