Është gjetur dhe trupi i pajetë i 39-vjeçares Alma Arrazi (Bushati), e cila dyshohet se u hodh nga ura e lumit Buna bashkë me tre fëmijët e saj të mitur, përkatësisht 9, 8 dhe 3 vjeç.
Mësohet se trupi i pajetë i Alma Arrazit është gjetur nga polumbarët e RENEA-s në fshatin Pentar të njësisë Dajç. Me gjetjen e trupit të viktimës së katërt, kanë përfunduar dhe kërkimet në lumin Buna, të cilat vazhdonin që prej së dielës.
Po ditën e sotme u gjet dhe trupi i pajetë i vogëlushit 3-vjeçar, i cili u gjet nga polumbarët e RENEA-s në afërsi të fshatit Oblikë të njësisë Ana e Malit pasi ishte spostuar nga rrjedha e lumit. Ndërkohë, ditën e djeshme u gjet dhe trupi i vajzës 8-vjeçare.
Për ngjarjen e rëndë është arrestuar Erdgys Arrazi, bashkëshorti i Almës dhe babai i tre fëmijëve të mbytur. Ai akuzohet se ka shtyrë gruan me fëmijët drejt vetëvrasjes. Gjykata e Shkodrës la për të në fuqi masëmn e sigurisë “arrest në burg”.
Nga hetimet e deritanishme dyshohet se Alma Arrazi është hedhur nga ura e lumit të Bunës mbrëmjen e 2 majit bashkë me tre fëmijët e saj. Në kamerat e sigurisë, 39-vjeçarja është parë se para vetëflijimit, ka pirë kafe me kunatën, me të cilët është ndarë qetësisht.
Një ditë më pas, më 3 maj, Erdgys Arrazi ka denoncuar në polici largimin nga banesa të gruas me fëmijët. Por, kur një peshkatar i zonës gjeti të pajetë trupin e 9-vjeçares Ergesa, ai u kthye në të dyshuarin kryesor për shkaktin e vetëvrasjes së bashkëshortes dhe tre fëmijëve të tij.
Nga familja e Almës, motra e saj, u ka thënë hetuesve se Erdgys Arrazi ushtronte dhune fizike e psikologjike ndaj 39-vjeçares e fëmijëve dhe vetëflijimi dyshohet se është pasojë e dhunës në familje. Dyshohet se Erdgys Arrazi e tradhëtonte bashkëshorten e tij, për të cilën Alma kishte marrë dijeni. Madje pretendohet se Erdgysi e nxirrte live të dashurën e tij në celular, dhe ia tregonte vajzës 9-vjeçe, Ergesës.
Prokuroria e Shkodrës ka sekuestruar celularin e Erdgys Arrazit, ku janë vërtetuar ofendimet dhe dhuna e tij ndaj bashkëshortes, po ashtu edhe lidhja jashtëmartesore që kishte.
Gjithsesi, familjarët e Erdgys Arrizit, jashtë kamerave, pretendojnë se ai nuk ushtronte dhunë dhe se tre fëmijët, ishin pika e dobët e tij.
“Jemi të lënduar dhe shokuar, nuk ja falim nuses vendimin fatal qe ka ndërmarrë duke i marrë jetën vetes dhe tre fëmijëve. Erdgysi i kishte pikë të dobët fëmijët, ai nuk i ka keqtrajtuar asnjëherë. Punonte gjithë ditën në dyqan celularësh për t’i dërguar në shkolla private. Çifti kohët e fundit kanë pasur debate dhe Alma merrte ilaçe në ambulatorin e lagjes për gjendje te rënduar emocionale por këtë vendim as nuk mund ta imagjinonim”, tha një prej familjarëve.
Erdgys Arrizi kërkoi leje për të marrë pjesë në ceremoninë e varrosjes së vajzës së tij, e cila u përcoll ditën e djeshme për në banesën e fundit, por kërkesa iu është refuzuar.
Kërkimet për gjetjen e tre trupave nga polumbarët e RENEA nisën të dielën dhe u përforcuan të hënën nga ushtria, duke kërkuar nga fshati Darragjat deri në grykëderdhjen e Bunës, në Velipojë. Po kështu u angazhuan në kërkime dhe forcat policore të Malit të Zi.
