Vetëm 6 muaj i mjaftuan për të siguruar trofeun e parë, në aventurën e tij të re.
Ish-sulmuesi i skuadrës së Teutës, Dejvi Bregu, u transferua gjatë merkatos së dimrit, nga turqit e Umraniyesporit te Wisla Krakow, me skuadrën legjendare të Polonisë, që këtë sezon garon në divizionin e dytë.
Skuadra e pozicionuar e pesta në Division 1 zhvilloi një përballje spektakolare, në finalen e Kupës së Polonisë, duke mundur skuadrën e Pogon Szczecin, me rezulatin 2-1 pas shtesës.
Koha e rregullt përfundoi me rezultatin e barabartë, 1-1 dhe në minutën e 3’-të, të kohës shtesë erdhi goli i fitores, me skuadrën e Wisla që fitoi trofeun për herë të 5-të, në histori.
Falë këtij suksesi, 28-vjeçari, nga Vlora, Dejvi Bregu fiton titullin e tij të 5-të, në karrierë dhe të parin jashtë futbollit shqiptar.
Kujtojmë se “fantazisti” ishte lojtari më i mirë i edicioni 2020-2021, të Kategorisë Superiore, teksa asokohe arriti të ndihmonte skuadrën e tij, Teutën të fitonte titullin e 2-të kampion në histori.
Përveç Teutës, në Shqipëri, Bregu ka luajtur edhe me Flamurtarin, Luftëtarin dhe Skënderbeun.
Dejvi Bregu ka fituar edhe Kupën e Shqipërisë me vlonjatët (2013–14), Kategorinë e Parë me Luftëtarin (2015–16), dhe Superkupën e Shqipërisë në vitin 2018 me Skënderbeun.
