Tirana vazhdon të bëjë përpara me shlyerjen e borxheve. Të hënën klubi bardheblu ka arritur të paguajë dy futbollistë të tjerë.
Bëhet fjalë për lojtarë të huaj, të cilët kishin bllokuar merkaton e Tiranës.
Skuadra bardheblu në këtë moment që flasim ka vetëm një bllokim në merkato për sa i përket ish-futbollistëve. Sulmuesi, Tim Vairine, ka bllokuar merkaton e kryeqytetasve dhe nuk e liron pa marrë paratë (shuma 126 mijë euro).
Tjetër problem është edhe ish-trajneri, Orges Shehi, për të cilin Tirana duhet të paguajë 30 milionë lekë të vjetra.
Për të marrë licencën për në Europë, Tirana është në luftë me kohën që të mbyllë marrëveshjet me ta, ndaj të cilëve ka detyrime të papaguara. Bardheblutë tani kanë paguar rreth 400 milionë lekë detyrime tatimore.
Drejtuesit e klubit kanë paguar detyrimet edhe ndaj Zhozelin Behiratçes, Edon Hasanit, Asion Dajës dhe Besir Isenit.
Të gjithë këta lojtarë kishin bllokuar bardheblutë ose në FIFA ose kishin fituar gjyqet në DHKZK të FSHF-së.
