Të shtëna me armë zjarri janë regjistruar paraditen e kësaj të enjte në Vaun e Dejës.
Policia sqaron se është qëlluar drejt një automjeti, ndërsa fatmirësisht nuk ka persona të lënduar.
Autor i ngjarjes dyshohet se është një 35-vjeçar, i cili është shpallur në kërkim nga Policia.
“Rreth orës 08:00, shtetasi Gj. N., 39 vjeç, banues në Koman, ka njoftuar Policinë se një shtetas i paidentifikuar, dyshohet se kishte qëlluar me armë zjarri pistoletë, në drejtim të automjetit të tij, pa shkaktuar dëmtime në njerëz.
Shërbimet e Policisë shkuan menjëherë në vendngjarje dhe falë veprime të shpejta profesionale dhe inteligjencës policore bënë të mundur identifikimin e autorit të dyshuar shtetasin V. K., rreth 35 vjeç dhe vijon kontrolli i zonës për kapjen e tij”,- njofton Policia.
Grupi hetimor, në drejtimin e Prokurorisë, po punon për zbardhjen e rrethanave dhe dokumentimin ligjor te rastit.
