Pasi u shpallën kampion duke fituar derbin përballë Milanit me rezultatin 1-2, të gjithë lojtarët e Interit janë në ‘qiellin e 7-të’. Një ndër to është edhe qendërmbrojtësi italian, Alessandro Bastoni.
Bastoni ka folur së fundmi për mikrofonat e “Il Giornale”, ku tregon dashurinë e madhe që ka për klubin zikaltër. Ai e cilëson Interin si familje të dytë, për të cilët do të hidhej edhe në zjarr.
“Unë gjithmonë e kam thënë se ne kemi një bazë shumë të fortë italiane brenda ekipit. Është diçka e rëndësishme dhe pikërisht ajo ç’ka bën diferencën në kampionat.
Fitimi i titullit në derbi është një kënaqësi e madhe. Të gjithë e donim, si klubi ashtu dhe tifozët e Interit, që janë të jashtëzakonshëm. Ata kanë qenë gjithmonë pranë. Kjo fitore do të mbetet përgjithmonë në historinë e Interit.
Fitorja me këtë ekip është e bukur. Kemi bërë shumë sakrifica vitet e fundit dhe kemi patur shumë zhgënjime. Por tani shikoj skuadrën dhe stafin me një tjetër ndjenjë, më duket sikur janë familja ime e dytë. Përt këtë familje unë do të hidhesha në zjarr”, është shprehur qendërmbrojtësi italian, Alessandro Bastoni.
