Prokuroria e Posaçme iu ka komunikuar këtë të martë akuzat disa prej ish-drejtorëve të Bashkisë së Tiranës të arrestuar në kuadër të aferës“5D”.
Burime konfirmojnë se Mariglen Qatos, Redi Mollës dhe Taulant Tushës iu është komunikuar akuza për veprat penale korrupsion pasiv dhe mosdeklarim pasurie, ndërsa mësohet se vijojnë hetimet pasi me komunikimin e akuzave nuk ka përfunduar ende faza hetimore për mbledhjen e fakteve dhe provave nga SPAK.
Kujtojmë se Redi Molla, ish drejtori i UKT-së, bashkë me Mariglen Qaton, ish drejtor i Inspektoriatit të Mbrojtjes së Territorit (IMT) në Bashkinë e Tiranës, u arrestuan nga SPAK, pasi akuzohen se nëpërmjet kompanisë “5D Konstruksion” sh.p.k., të drejtuar indirekt prej tyre, kanë përfituar dhjetra miliona euro para publike, përmes prokurimeve të Bashkisë së Tiranës dhe institucionet vartëse të saj.
