Një sherr që ka degraduar në përplasje fizike raportohet të ketë ndodhur mëngjesin e kësaj të hëne në Lukovë.
Dy turiste, njëra gjermane tjetra amerikane janë përleshur me njëra-tjetrën për shkak të një konflikti të çastit, dhe si pasojë 60-vjeçarja nga Gjermania ka shtyrë nga shkallët 54-vjeçaren nga Amerika, duke e lënë kështu të plagosur.
Kjo e fundit është nisur drejt spitalit për ndihmë mjekësore. Paraprakisht dyshohet se shtetasja gjermane vuan nga probleme të shëndetit mendor.
“Mëngjesin e sotëm, në Lukovë, dyshohet se gjatë një konflikti të çastit, shtetasja gjermane E. H., 60 vjeçe (dyshohet se vuan nga shëndeti mendor) ka shtyrë nga shkallët, shtetasen amerikane T. P., 54 vjeçe. Këto dy shtetase banonin në dy apartamente pushimi, me qira, në objektin ku ka ndodhur konflikti.
Shtetasja T. P. është transportuar në spitalin e Vlorës, për ndihmë mjekësore, ndërsa shtetasja E. H. është shoqëruar për trajtim mjekësor, në spitalin psikatrik të Vlorës”,- thuhet në njoftimin e Policisë.
Grupi hetimor po punon për sqarimin e plotë të rrethanave të ngjarjes. Për këtë rast janë njoftuar edhe ambasadat përkatëse.
