Ka ndërruar jetë 24 vjeçarja, e cila së bashku me 3 persona të tjerë u përplas nga një makinë që drejtohej nga një shofer i dehur në aksin Prrenjas- Qafë Thanë.
E reja ndërroi jetë pas 5 ditësh në koma te “Trauma” në kryeqytet.
Blutë njoftojnë se Jetmir Daci, shoferi i cili shkaktoi aksidentin dhe përplasi 4 persona, duke shkaktuar së fundmi dhe vdekjen e 24-vjeçares, është arrestuar ditën e sotme nga policia.
Personat e aksidentuar qëndronin në këmbë para servisit dhe po prisnin që makina e tyre të riparohej, teksa u përplasën nga 44-vjecari.
Njoftimi:
Në vijim të veprimeve të thelluara hetimore dhe procedurale të kryera për zbardhjen e rrethanave të aksidentit të ndodhur më datë 08.04.2024, në aksin rrugor “Prrenjas-Qafë Thanë”, ku si pasojë mbetën të dëmtuar 4-shtetas, specialistët e Sektorit të Policisë Rrugore kanë ndaluar me iniciativë shtetasin J. D., 44 vjeç, banues në Peshkopi, për veprën penale “Shkelja e rregullave të qarkullimit rrugor”.
Shtetasi J. D., me automjetin që drejtonte, ka përplasur një automjet dhe si pasojë e humbjes së kontrollit nga drejtuesi, ka goditur dhe një automjet tip “Passat”, në ambientet e një servisi. Për pasojë janë dëmtuar 4 shtetas që ndodheshin jashtë automjetit “Passat” (pasagjerë që udhëtonin në këtë automjet).
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
