Nuk mund të kishte rezultat më të drejtë, për atë çka dhuruan 90 minutat e lojës, me Arsenal, që e mbyllën në barazimin, 2-2, sfidën e parë çerekfinale, të UEFA Champions League, ndaj Bayern Munich, duke dhuruar kështu spektakël, për të pranishmit, në “Emirates Stadium”.
Nga dy gola për secilën skuadër mjaftuan për të “vulosur” rezultatin, me Bukayo Saka e Leandro Trossard, që shënuan nga një gol, në minutat 12’ e 76’, të sfidës, ndërsa për djemtë e Thomas Tuchel menduan “fantazisti” Serge Gnabry e “bomberi” anglez, Harry Kane, me rrjetat e tyre, të siguruara gjatë pjesës së parë, në minutat 18’ e 32’.
Falë këtij rezultati, tashmë gjithçka për një “biletë” gjysmëfinaleje, të UEFA Champions League do të vendoset mbrëmjen e 16 prillit, me Bayern, që do të presin në “Allianz Arena”, të Mynihut, skuadrën e Mikel Arteta-s, në një sfidë që nuk pritet të jetë aspakt e lehtë, për anglezët, të cilët me shumë mundësi mund t’i japin “lamtumirën” kompeticionit.
