Kryetarja e Kuvendit, Lindita Nikolla ka sqaruar arsyet pse nuk është zbatuar vendimi i Gjykatës Kushtetuese për Xhaçkën.
Në fjalën e saj në mbledhjen e Këshillit të Mandateve, Nikolla u shpreh se shkak për zvarritjen e procesit ishte situata anormale në Parlament për shkak të qëndrimit të opozitës.
Nikolla: Janë ndjekur të gjitha procedurat që neni 87 i procedurës së Kuvendit parasheh.
Këshilli i Legjislacionit nuk mund të mblidhej pa dalë në fletoren zyrtare vendimet e Gjykatës Kushtetuese përsa i përket periudhës tjetër nga korriku dhe deri te momenti që flasim, besoj mund ta drejtoni pyetjen nga vetja, pasi e dini shumë mirë që e keni përfshirë parlamentit në anormalitet dhe nuk mund të mblidheshim në mënyrë krejtësisht të njëanshme për të mbledhur, qoftë për të marrë vendim këtu në Këshillin e Mandateve dhe në seancë plenare.
Kujtojmë se çështja e mandatit të Xhaçkës u risoll në qendër të vëmendjes nga kreu i Grupit Parlamentar të PD, Gazmend Bardhi, pas arrestimit të ish kryebashkiakut të Himarës me akuza për tjetërsimin e një prone në Himarë ku bashkëshorti i ish ministres po ndërton një kompleks turistik.
Përfaqësues të tjerë të opozitës kanë akuzuar Partinë Socialiste se është bërë mburojë politike për Xhaçkës, pretendime që janë mohuar nga anëtarët e mazhorancës qeverisëse.
