Erzeni ka fituar 1 me 0 ndaj Egnatias, në sfidën e vlefshme për javën e 31-të të Superiores. 3 pikë që erdhën nga goli i Zekës në pjesën e dytë dhe i japin shpresë Erzenit te mbijetesa.
Në anën tjetër Egnatia humbi rastin e artë për t’u shkëputur, pasi Partizani dhe Vllaznia barazuan dje.
Në përfundim të sfidës foli për mikrofonin e MCN, trajneri i Erzenit Alfred Deliallisi.
Çfarë rëndësie merr triumfi? “Dua të komplimentoj djemtë për ndeshjen deri në perfeksion. Kanë merita. Mënyra si interpretuam, ishim gati perfeksion, asnjë rast të pastër kundërshtari. Ishim superior gjithë kohës me raste dhe qarkullim topi dhe si shkonim në sulm dhe si mbroheshim. Rezultati i përket fushës, çfarë dhanë djemtë”.
Ishte e përgatitur kjo mënyrë loje? “Kisha ndarë lojtarët 1 kundër 1. Ato të mos ishin superior dhe të mos afroheshin në zona të rrezikshme”.
Pse dy anë medalje kjo skuadër? “Prurjet e reja kanë dashur kohën e tyre. Dhe me Vllazninë shumë mirë, apo Laçin, por u mundën. Kanë hyrë në sinkron. Mos harrojmë se kemi afruar 11-12 lojtarë në janar, tani grupi 100%. Jemi në lojë dhe koha na e lejon të shpëtojmë sezonin”.
