Deputetët e Partisë Socialiste kanë bojkotuar mbledhjen e sotme të Komisionit Hetimor Parlamentar për dy koncesionet në shëndetësi, ai i sterilizimit dhe check up-it.
Siç shihet edhe nga pamjet e mëposhtme, deputetët e opozitës janë paraqitur të gjithë në sallë për të zhvilluar mbledhjen e tretë të këtij komisioni, ndërkohë që karriget e socialistëve janë bosh. Gjithsesi, kjo nuk e ka ndaluar opozitën që të zhvillojë mbledhjen, e cila ka zgjatur rreth 7 minuta.
E turpshme është fakti se faqja e Kuvendit të Shqipërisë nuk i transmetoi aspak pamjet, por mbledhja u bë me dije përmes pamjeve të transmetuara nga celularët e deputetëve të opozitës.
Kryetarja e komisionit, deputetja Albana Vokshi akuzoi mazhorancën se po përpiqet që të pengojë punën e komisionit hetimor, teksa njoftoi mbledhjen e ardhshme për ditën e premte.
“Mirëdita, sikurse është njoftuar dje, kam njoftuar mbledhjen e sotme të komisionit hetimor sot. Një thirrje sipas procedurave parlamentare dhe rregullores së Kuvendit. Mbledhja e sotme u thirr sepse kolegët e mazhorancës refuzuan që të kalonin kërkesën për informacion. Votuan kundër pikës nr.4 të rendit të ditës dhe meqenëse refuzuan njoftova mbledhjen e sotme sipas procedurave. Dua të bëj me dije se mbledhja e sotme është thirrur në bazë të rregullores. Kam diskutuar dhe me nënkryetarin e këtij komisioni, Plarent Ndreca, që të formulonin një rregullore të posaçme për punën e këtij komisioni, por ata refuzuan duke thënë se duhet të bazohemi në rregulloren e përgjithshme të Kuvendit të Shqipërisë. Neni 32, pika 2 e rregullores thotë që mbledhjet e komisionit thirren nga kryetari tij. Unë i kam njoftuar dhe mazhoranca është në shkelje flagrante të rregullores së Kuvendit. Edhe sot siç e shihni ka refuzuar të vijë, vendet janë bosh. Pra, pavarësisht se mazhoranca po tenton të pengojë punën në komision në papërgjegjshmëri totale, duke përdorur trike, hile të paqena, absurde, dua të njoftoj mbledhjen e radhës të premten në orën 11:00. Kam marrë firmat e të gjithë deputetëve të opozitës.“ – tha Albana Vokshi.
Ndërkohë, ditën e djeshme mazhoranca rrëzoi kërkesën për të plotësuar formularët nëse anëtarët e komisionit kanë apo jo konflikt interesi. Formularët u plotësuan vetëm nga ana e mazhorancës.
Vokshi tha ditën e djeshme se socialistët kanë frikë të firmosin deklaratën, sipas saj se deputeti Plarent Ndreca është në konflikt të interesit, pasi ka qenë avokat i një prej të akuzuarve për koncesionin e sterilizimit, ku bëhet fjalë për Arben Gjatë.
Ndërkohë, deputetja e PD-së, Ina Zhupa deklaroi se edhe anëtarja tjetër e komisionit nga ana e mazhorancës, Milva Ekonomi është në konflikt interesi, pasi ka qenë zv.ministre e Shëndetësisë në kohën kur janë dhënë koncesionet. Duke iu referuar lajmeve, Zhupa tha se Ekonomi ka firmosur pasi ka qenë kryetare e komisionit të vlerësimit të ofertave dhe për këtë ka dëshmuar edhe në SPAK.
Në mbledhjen e djeshme u miratuan edhe emrat e katër ekspertëve që do të ndohmojnë hetimin. Më konkretisht, dy emrat e propozuar nga PD: Franci Nuri dhe Meri Like; si dhe dy emrat e propozuar nga PS: Bledar Skënderi dhe Ermir Bejtja.
Në mbledhjen e djeshme pati debate mes palëve dhe në lidhje me pretendimet e mazhorancës, se kryetarja e komisionit, Albana Vokshi duhet të raportojë çdo në sekretariat, ku sekretar i kimisionit u zgjodh në mbledhjen e parë socialisti Klevis Xhoxhi.
