Cavan Sullivan është vetëm 14 vjeç, por konsiderohet si lojtari më i mirë në botë në mesin e të lindurve në vitin 2009. Amerikani, në pronësi të Philadelphia Union, ka përfunduar në radarët e disa klubeve prestigjioze evropiane.
Nga Borussia Dortmundi te Bayern Munich, duke kaluar te PSG dhe Real Madridi, për të përfunduar me Manchester City, që duket se ka arritur të mbizotërojë ndaj të gjithëve. Sipas “The Athletic”, marrëveshja mes “qytetarëve” dhe klubit amerikan tani është gjetur, por janë vendosur pengesa të rëndësishme përpara se të vazhdohet me nënshkrimet.
Sullivan është ende pjesë e sektorit të të rinjve të Filadelfias dhe për këtë arsye marrëveshja e parashikuar është shumë e rëndë me bonuse dhe një përqindje të madhe të shitjes.
Përpara se të largohet drejt Manchester City, adoleshenti Sullivan është duke finalizuar një kontratë të brendshme me MLS, që do ta mbajë atë në SHBA deri në transferimin e tij në Angli.
“The Athletic” raporton se marrëveshja e arritur do të jetë më e pasura në historinë e MLS. Sullivan do të jetë në gjendje të bëjë debutimin e tij për ekipin e parë të Philadelphia Union vetëm pasi të nënshkruajë.
Termat, kushtet dhe shifrat nuk dihen ende, por e sigurt është se Philadelphia Union ka rënë dakord me Manchester City për ta dërguar Sullivan në Evropë vetëm pasi të mbushë 18 vjeç dhe të bëjë debutimin në MLS.
Prandaj, plani fillestar i City u anulua, pasi Sullivan kishte menduar transferimin te Lommel SK (ekip belg i kategorisë së dytë), në moshën 16-vjeçare, përpara se të kalonte në “Etihad” në moshën 18-vjeçare. Pas diskutimeve mes të gjitha palëve, u arrit një marrëveshje e re për zhvillimin e tij, sipas së cilës Sullivan do të qëndrojë në Filadelfia.
