Është shtyrë sërish seanca gjyqësore për ish-ministrin e Mbrojtjes, Fatmir Mediu, i cili është vënë nën hetim për tragjedinë e Gërdecit. Mësohet se lidhur me çështjen u paraqit për të dëshmuar Mihal Delijorgji, por kky i fundit ka refuzuar të japë dëshmi për shkak se ka qenë bashkë i pandehur.
Në këtë seancë, nuk u paraqit Anjola Agolli, ish sekretare e ministrisë së Drejtësisë, Denis Hajdar dhe Luan Hoxha. Për Denis Hajdarin prokuroria kërkoi shoqërimin e detyrueshëm pasi ka marrë dijeni dhe nuk është paraqitur. Ndërsa për Anjola Agollin e Luan Hoxhën të vijojë kërkimi.
Senaca e radhës do të mbahet më 9 prill në orën 09:00.
Sakaq në deklaratën e tij për mediat, pas daljes nga seanca Mediu tha se dëshmitarët e prokurorisë refuzojnë të dëshmojnë, çka tregon se edhe prokuroria i ka sjellë si dëshmitarë formalë.
Mediu: Besoj është gjëja më e drejtë që nëpërmjet pyetjeve të dalë e vërteta. Letërporositë janë një akt formal. Nuk e kuptoj pse nuk u bë në atë formë kur drejtësia amerikane e ka mundësuar.
Duket që prokuroria nuk po jep asnjë të dhënë të re. Dëshmitarët e prokurorisë refuzojnë dëshminë. Mospërgjigja e tyre tregon që edhe prokuroria i ka sjellë si dëshmitarë formalë.
Mediu po hetohet për çështjen ‘Gërdeci’, tragjedia që ndodhi në 15 mars të 2008-ës, ku nga shpërthimi i punishtes së demontimit të armëve mbetën 26 të vrarë dhe qindra të plagosur. Mediu po gjykohet për dy akuza, atë të “Shpërdorimit të Detyrës” dhe “Shpërdorim i detyrës në bashkëpunim me subjekt ushtarak-kuadër komandues”.
Ish-ministri ka mohuar akuzat ndaj tij, duke u shprehur se gjatë detyrës ka zbatuar gjithnjë ligjin.
