Ministri i Brendshëm, Taulant Balla është pyetur në lidhje me bashkinë e Himarës dhe cili do të jetë në krye, ndërkohë që kryetari i zgjedhur Fredi Beleri ndodhet në burg dhe kryetari që ishte në detyrë Jorgo Goro ka dhënë sot dorëheqjen nga qelia e paraburgimit.
Balla u shpreh se rastet e krijimit të vakancave të krijuara në çfarëdo lloj forme, parashikohen në ligjin për organizimin e qeverisjes vendore.
Në lidhje me hipotezat se a do të jetë Vangjel Tavo ai që do të drejtojë këtë bashki, Balla tha se qeveria do të zbatojë ligjin.
“Ligji për organizimin e qeverisjes vendore parashikon rastet e vakancës të krijuar në të gjitha format. Dorëheqja sapo ka ndodhur. Brenda 48 orësh prefekti njofton organet e qeverisjes ligjor. Qeveria do zbatojë ligjin pikë për pikë”, tha ministri në prononcimin e mbajtur për gazetarët pas mbledhjes së qeverisë.
Duke iu kërkuar një koment për arrestimin e Jorgo Goros, Balla tha se “qëndrimi ynë është i qartë, nuk komentojmë asnjëherë vendimet e drejtësisë. Drejtësia ka gjithë mbështetjen tonë për të vijuar dhe për të çuar para luftën kundër korrupsionit dhe shkeljes së ligjit”.
