Ndryshon dinamika e plagosjes së Enidor Dedjas një ditë më parë në Shijak, në një dyqan që shet pjesë këmbimi automjetesh. Policia bën me dije se ka arrestuar pronarin e biznesit, 27-vjeçarin Albano Domi, banues në Xhafzotaj dhe ka shpallur në kërkim dy persona të tjerë.
Sipas bluve, mes palëve ka pasur shkëmbim zjarri.
Si pasojë e të shtënave u plagos në këmbë 36-vjeçari Enidor Dedja, i cili ishte prezent në dyqan në momentin e ngjarjes.
Përplasja me armë, njoftoi zyrtarisht policia, erdhi pas një konflikti “për motive të dobëta”. Ndërkaq, burime thanë se “mollë sherri” është bërë konflikti për një vjazë.
Dy personat e tjerë që janë konfliktuar me Domin dhe janë shpallur në kërkim janë Arbër Hoxha, 30 vjeç dhe Xhejms Palodhi, 33 vjeç, të dy banues në Durrës.
“Nga hetimet rezultoi se për motive të dobëta, shtetasit Arbër Hoxha dhe Xhejms Palodhi janë konfliktuar fizikisht me shtetasin Albano Domi dhe më pas kanë qëlluar me pistoletë në drejtim të tij. Si pasojë e të shtënave është plagosur dhe është jashtë rrezikut për jetën, shtetasi Enidor Dedja, i cili ishte në dyqan kur ka ndodhur konflikti. Po nga hetimet rezultoi se dhe pronari i dyqanit, shtetasi Albano Domi iu është kundërpërgjigjur me armë zjarri pistoletë, shtetasve Arbër Hoxha dhe Xhejms Palodhi.”, njoftoi policia.
Efektivët kanë gjetur dhe sekuestruar në cilësinë e provës materiale 1 pistoletë që dyshohet se është përdorur nga shtetasi pronari i dyqanit. Ndaj tij rëndojnë akuzat për veprat penale “Kanosja” dhe “Mbajtja pa leje dhe prodhimi i armëve, i armëve shpërthyese dhe municionit”.
Ndërsa të shpallurit në kërkim akuzohen për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, i armëve shpërthyese dhe municionit”.
