Të shtëna me armë zjarri janë shënuar në Shijak këtë të premte, ku një person ka mbetur i plagosur.
Enidor Dedja, 36 vjeç, është plagosur në këmbë dhe ndodhet jashtë rrezikut për jetën. Autori është identifikuar si Arbër Hoxha, 30 vjeç dhe është shpallur në kërkim.
Konflikti mes palëve, sipas bluve, dyshohet se ka lindur për motive të dobëta.
“Rreth orës 11:15, dyshohet se gjatë një konflikti të çastit, për motive të dobëta, është plagosur me armë zjarri në këmbë shtetasi E. D.,36 vjeç, banues në Shijak, i cili është në kujdesin e mjekëve, jashtë rrezikut për jetën. Shërbimet e Policisë, me marrjen e njoftimit, shkuan menjëherë në vendin e ngjarjes dhe falë veprimeve të shpejta hetimore bënë të mundur identifikimin e autorit të dyshuar shtetasit A. H., 30 vjeç, banues në Durrës dhe vijon krehja e zonës për kapjen e tij. Grupi hetimor, në drejtimin e Prokurorisë, vijon punën për sqarimin e plotë të rrethanave të ngjarjes”, thuhet në njoftimin paraprak të policisë për ngjarjen.
