Drejtuesi i “Lëvizja Bashkë”, Arlind Qori, deklaroi në studion e emisionit “Të Paekspozuarit” se projekti 1 miliard dollarë që mendohet të bëhet në Sazan nga dhëndri i ish-presidentit Trump është vendosur me kushte okulte dhe Edi Rama e ka vendosur fituesin pa garë ndërkombëtare, pa kritere.
“Duhen përcaktuar kriteret dhe kushtet e garës ndërkombëtare. Këtu është përcaktuar fituesi përpara kushteteve dhe kritereve. Ju thoni 1 miliard euro. Po sikur të vijë një tjetër dhe të thotë 3 miliardë euro? Si mund të jetë përcaktuar fituesi pa përcaktuar garën ndërkombëtare?
Edi Rama e ka vendosur fituesin. Është Kushneri. Ka vendosur në kushte okulte. E demaskoi “New York Times” dhe ai ka gjetur një shtet pa asnjë garanci institucionale. Përmend edhe një oligark shqiptar, Shefqet Kastratin, që do të jetë nënkontraktori dhe me shumë gjasë mund të jetë ai dhe Kushneri me shokë do të jetë vetëm marka. Ky është i gjithi një operacion imazhi. Kjo është një aferë, në rastin më të mirë të lobimit, në rastin më të keq të korrupsionit. Sikur kjo të kishte ndodhur në SHBA, sikur Biden t’ia kishte dhënë një ishull dikujt pa rregulla, ai do të ishte i hetuar sot dhe askush nuk e shtron çështjen pse Edi Rama nuk po hetohet për këtë çështje. A ka dhënë një premtim që nuk është në kompetencën e tij? Pse nuk bëhet garë? Pse nuk përcaktohen kriteret?”-tha Qori.
