Janë zbardhur detaje të reja nga atentati i regjistruar pasditen e kësaj të premte në fshatin Larushkë të Fushë Krujës, ku u ekzekutua me breshëri kallashnikovi, ish-polici i burgjeve, Gentjan Bejtja, i cili i kishte shpëtuar tre atentateve të mëparshme.
Burime bëjnë me dije se Bejtja është ekzekutuar sapo ka mbërritur në banesën e tij, teksa në momentin e ekzekutimit ishte afër magazinës që ka pas shtëpie.
Dyshohet se dy persona i janë futur në oborrin e banesë dhe e kanë ekzekutuar me breshëri kallashnikovi, teksa një person i tretë dyshohet se i priste në automjetin e tij. Fillimisht, autorët e kanë qëlluar Bejtjan në oborr, por ai ka tentuar të largohet në pjesën e pasme dhe autorët e kanë ndjekur dhe e kanë ekzekutuar.
Mësohet se në banesë Gentjan Bejtjan e priste vetëm e ëma, pasi bashkëshortja dhe fëmijët e tij ishin larguar që prej atentatin të korrikut të vitit të kaluar, ku iu plagosën dy fëmijë e mitur dhe iu vra kunati Ramazan Sino.
Gentjan Bejtja ishte në kërkim nga Policia për t’u marrë në pyetje për atë atentat. Për herë të parë pas 8 muajsh në kërkim policor, Gentian Bejtja u kthye në banesë, por gjeti vdekjen.
Pas krimit një foristradë “Land Rover” ngjyrë e bardhë u gjet e djegur në fshatin Hasan, jo shumë larg rrethrotullimit të Fushë Krujës, 5 km larg vendit ku ndodhi vrasja. Dyshohet se iu përket autorëve.
Gentjan Bejtja njihet për përplasje të forta me vëllezërit Valter dhe Durim Bami dhe Marklen Hakën.
