Kreu i SPAK, Altin Dumani ka përgënjeshtruar lajmin e publikuar në media se gjatë fjalës së tij në takimin pa kamera të organizuar nga “IDM Morning Briefing”, të ketë thënë se krimi i organizuar ka kërcënuar familjen e një prokurori.
Në një reagim për Report Tv, Dumani sqaron se nuk ka përmendur një kërcenim konkret, por deklarata e tij u bë në kontekstin se prokurorët, nuk ndihen të shqetësuar për kërcënimet që vijnë nga politika, por për kërcënimet nga krimi i organizuar. Gjithsesim, Dumani thekson se prokurorët janë të përgatitur për çdo gjë.
“Nuk kam thënë në takimin që jam thirrur ditën e sotme, që është kërcënuar familja e ndonjë prokurori. Më është bërë një pyetje, nëse ndihen të kërcënuar prokurorët nga politika apo krimi i organizuar dhe kam thënë që nuk jam i shqetësuar nga politika, por nga krimi i organizuar, të cilat janë shtuar dhe prokurorët janë të përgatitur për çdo gjë.”, – ka sqaruar Dumani.
