Deputetja demokrate Jorida Tabaku, në një video mesazh në rrjete sociale përsa i përket procesit të integrimit në Bashkimin Europian, thotë se nga ky proces përfitojnë qytetarët nëse ata vendosen në qendër të ndryshimit dhe jo politika.
Tabaku shprehet se së pari duhen vendosur në qendër të ndryshimet njerëzit, jo politika. Mandej, duhet ndryshuar ekonomia duke bërë reforma dhe duhet siguruar që kjo të ndodhë në një demokraci që ka fuqinë për të ndërtuar reforma.
Më tej ajo shton se për këtë ndryshim nevojitet një demokraci funksionale dhe një sistem anti-korrupsion. Sistemi anti-korrupsion, sipas Tabakut duhet të nis nga ligjet e prokurimit dhe doganat, e duke vijuar më pas deri tek koncesionet.
Mesazhi i plotë i Tabakut:
Procesi integrimit është për ju! Për qytetarët! Nuk është proces për politikën! Prandaj, çdo gjë sigurisht duhet bërë në funksion të këtij procesi. çfarë përfitojnë qytetarët nga ky proces? Së pari duhen vendosur njerëzit dhe jo politika në qendër të ndryshimit.
Së dyti duhet ndryshuar ekonomia dhe duhet të bëhen reforma për integrimin e tregut, për integrimin e njerëzve, për integrimin e diplomave, duke pasur parasysh qytetarin dhe jo politikën në qendër.
Së treti duhet siguruar që kjo ndodh në një demokraci funksionale. Në një parlament që ka fuqinë e tij për të kontrolluar dhe mbikëqyrur dhe nga ana tjetër që ka fuqinë për të ndërtuar reforma që lidhen në përfitim të njerëzve. Dhe këtu dua të veçoj së pari anti-korrupsionin.
Çfarë e pengon qeverinë, parlamentin të ngrejë një sistem ndryshe nga ai që është sot. Një sistem ku fryma antikorrupsionit është në çdo ligj, në çdo reformë. Duke nisur nga ligjet e prokurimeve publike e duke vazhduar tek doganat, tek ligjet që lidhen me tregun dhe duke vazhduar tek ligjet që lidhen me koncesionet.
Çdo gjë duhet të jetë në të vendosjes së lidhjes së procesit të integrimit me njerëzit. Prandaj, kjo fjalë që është vendosur vend a pavend dhe që shpeshherë edhe për njerëzit nuk ka pasur asgjë të prekshme duhet ndryshuar dhe duhet bërë në funksion të asaj që përfitojnë qytetarët. Për të vendosur njerëzit dhe jo politikën në qendër.
