Kombëtarja e Shqipërisë U-21 do të rikthehet në fushë në muajin mars për të zhvilluar dy ndeshjet e radhës eliminatore të Europianit të kësaj grupmoshe.
Shpresat e drejtuara nga Alban Bushi do të përballen me Finlandën dhe Zvicrën, përkatësisht më 22 dhe 26 mars, në stadiumin “Air Albania”, teksa trajneri ka publikuar edhe listën e futbollistëve që do të grumbullojë për këto dy takime.
Pjesë e listës janë pothuajse emrat e njëjtë me ndeshjet e kaluara, me një kombinim të lojtarëve vendas, me ata që luajnë jashtë vendit. Risi në listën e Alban Bushit është padyshim edhe mesfushori 18-vjeçar Feta Fetai.
Shqiptari nga Maqedonia e Veriut, iu bashkua një vit më parë Lokomotivës së Zagrebit, ku numëron 13 ndeshje këtë sezon, ndonëse pjesën më të madhe duke ardhur nga stoli. Fetai kishte luajtur më herët me moshat e Maqedonisë së Veriut dhe kërkohej edhe nga Kroacia e Zvicra, megjithatë kuqezinjtë ia dolën të bëjnë një punë bindëse dhe ta bashkojnë me Shpresat.
Krahas Feta Fetait, te Shpresat Kuqezi vjen për herë të parë edhe mesfushori i talentuar Elion Jashari, i cili është pjesë e Baselit U19 dhe shihet si një nga lojtarët më premtues. Jashari ka qenë më parë pjesë edhe e moshave të Kosovës, teksa tashmë do të provojë të tregojë cilësitë e tij te Shqipëria U21.
Në sy bie mungesa e Kristjan Shpendit, i cili mbrëmjen e djeshme ishte sërish protagonist tek fitorja e Cesenës në Serinë C me një gol dhe një asist. Ai arriti në kuotën e 20 golave në kampionat.
Shpresat kuqezi mbajnë aktualisht vendin e tretë në renditje dhe janë plotësisht në garë për t’u kualifikuar në Europianin U21, ndaj për këtë arsye ndeshjet e marsit marrin një rëndësi edhe më të madhe.
LISTA
Portierë: Klidman Lilo, Endri Dema dhe Simon Simoni
Mbrojtës: Adrian Bajrami, Ajdi Dajko, Marcelino Preka, Paulo Buxhelaj, Hysni Ismaili, Agan Mjaki, Elmando Gjini, Geralb Smajli, Ermis Selimaj
Mesfushorë: Tim Civeja, Leandro Frroku, Medon Berisha, Adrion Pajaziti, Elion Jashari, Feta Fetai
Sulmues: Ermir Rashica, Arlind Rexhepi, Stiven Shpendi, Ardit Nikaj, Arda Kurtulan.
