Polemika për penalltinë e Tiranës në fundin e takimit me Egantian të dielën, që i lejojë bardheblutë të barazojnë shifrat në 1-1 në fundin e ndeshjes.
Trajneri i Egnatias, Edlir Tetova pati pretendime për arbitrimin, duke thënë se penalltia nuk duhej dhënë për bardheblutë, pasi kishte prekje me dorë gjatë aksionit. Sipas tij, Egnatia e fitoi ndeshjen.
“Normal që kam kontestime për penalltinë. Ekipi im e ka fituar ndeshjen, lojtari e ka marrë me dorën topin në hyrje të zonës. Edhe ndërhyrja e Hoxhallarit ishte penallti për ne në pjesën e parë. Ky nuk është rezultat i drejtë. Absolutisht ekipi im e ka fituar ndeshjen sot”, tha ai në një prononcim për mediat pas ndeshjes.
Ndërsa trajneri i Tiranës u shpreh pas takimit se bardheblutë bënë një ndeshje të mirë dhe gabimi i vetëm ishte te goli i pësuar.
“Me thënë të drejtën ashtu si u zhvillua ndeshja ne kishim më shumë epërsi si në zhvillimin e lojës, por kishim më shumë raste. Gabimi i vetëm ishte te goli. Nuk pashë ndonjë rënie fizike pasi kishim në kontroll ndeshjen gjatë gjithë kohës. Një moment ishte dhe u ndëshkuam. Mos harrojmë luanim kundër Egnatias që është në vendin e parë dhe ka kualitete. Ky ishte rezultati më i drejtë.
Të jem realist unë kisha të tjera zëvendësime në mendje për të bërë. Por pas pësimit të golit ndryshoi situata dhe u munduam të luanim me topa të gjatë. Nga kjo erdhi dhe penalltia në favorin tonë. Kisha tjetër plan në kokë, por siç e ka futbolli ndryshojnë shumë situata. Pishmanllik kam vetëm 3 pikët sot. Çunat për mendimin tim sot kanë bërë maksimumin, përveç se duhet të ishim më të qetë në pasimin e fundit. Ditën e martë do të kthehet Najdovski me skuadrën. Meta është në fazë rikuperimi dhe pjesa e tjetër është në rregull, tha Erbim Fagu.
