NJë person i shpallur në kërkim nga autoritetet e drejtësisë shqiptare është arrestuar në Spanjë.
Policia e Shtetit bën me dije se në kuadër të operacionit të koduar “Four” është vënë në pranga shtetasi Lutfi Xeka, 34 vjeç, me qëllim ekstradimin e tij në Shqipëri. Raportohet se ai është kapur në Spanjë pas shkëmbimit të informacionit mes Interpol Tiranës dhe Interpol Madridit.
Lutfi Xeka është dënuar me 4 vjet burgim, si bashkautor i 3 rasteve të kultivimit të bimëve narkotike, të kryera gjatë vitit 2019.
“Gjykata e Krujës e ka dënuar këtë shtetas, me 4 vjet burgim, për veprën penale “Kultivimi i bimëve narkotike”, kryer në bashkëpunim. Shtetasi Lutfi Xeka, në bashkëpunim me 11 të tjerë, kanë kultivuar qindra bimë narkotike cannabis sativa. Veprimtaria kriminale e këtyre shtetasve është goditur nga Policia, në 3 raste gjatë vitit 2019.” – thuhet në njoftimin e Policisë.
Autoritetet bëjnë me dije se vijon puna për të kryer ekstradimin e këtij shtetasi, në Shqipëri.
