Aktori Gerard Depardieu është akuzuar sërish për sulm seksual.
Prokuroria e Parisit ka njoftuar hapjen e një hetimi të ri pas akuzës për sulm seksual gjatë xhirimeve të filmit “Les Volets Verts” të Jean Becker në 2021.
Paditësja quhet Amelie, 53 vjeçe, në padinë e saj të depozituar në prokurorinë e Parisit e akuzon aktorin për sulm seksual, ngacmim seksual dhe sharje seksiste.
Gerard Depardieu dyshohet se e kapi atë nga beli dhe ia shtrëngoi gjoksin, përpara se truprojat e tij të ndërhynin.
“Truprojat e tij e morën atë”, tha Amelie për Mediapart. “Ai po bërtiste dhe po qeshte me vete.
Ai më bërtiti: ‘Do të takohemi përsëri, dashuria ime’. Isha e habitur, isha e shqetësuar”.
Aktori më herët ka qenë nën hetim që nga viti 2020, pasi aktorja Charlotte Arnoul pretendoi se ajo ishte viktimë e përdhunimit në gusht 2018. Ai gjithashtu akuzohet për sulm seksual ndaj një ish-asistente të prodhimit në xhirimet e një filmi në vitin 2014.
