Tirana i dha dje dorën e fundit përgatitjeve për sfidën me Vllazninë. Dilema e madhe e Tiranës është nëse do të luajë 4- 3-3 apo 3-5-2. Më saktë, nëse do të jetë në fushë Patrik apo do të luajë Mici nga minuta e parë.
Fagu i provoi të dy formacionet dhe me shumë mundësi do të luajë me 3-5-2. Në portë, tashmë i kolauduari Kozi. Mbrojtja me tre: Hoxhallari, Lulaj dhe Mici. Mesfusha trekëndësh me Deliu-Jonuzi dhe maja Lushkja. Nga krahët, Haxhiu dhe Përgjoni. Në sulm dyshja Abazaj-Latifi.
Pas një dreke në kryeqytet bardheblutë kanë udhëtuar drejt Shkodrës. Dy futbollistë rrezikojnë për çështje kartonësh në sfidën e Vllaznisë. Ata janë Hoxhallari, dhe Haxhiu. Nëse ndëshkohen me të verdhë ndaj shkodranëve, do të mungojnë me Egnatian.
Tirana, është e gjashta me 35 pikë në renditje, po aq sa Dinamo. Tirana do të vuajë gjithashtu edhe dy mungesa dëmtimesh, Najdovski dhe Meta. Tirana ka tri ndeshje që nuk fiton në kampionat, pasi ka dy barazime me Erzenin dhe Laçin, si dhe humbjen me Partizanin. Po barazim ka dalë sfida e parë e çerekfinales së Kupës së Shqipërisë mes Teutës dhe kryeqytetasve.
Bardheblutë do të luajnë në Shkodër, më pas kanë katër ndeshje rresht në shtëpi me Teutën në Kupë, Egnatian, Dinamon dhe sërish Teutën jashtë, por në kampionat. E bukura e kësaj situate është fakti se bardheblutë luajnë sezonin në këto pesë takime.
Pas Vllaznisë, duke përjashtuar gjysmëfinalet dhe finalen e Kupës së Shqipërisë nëse kualifikohet, Tirana i luan më shumë sesa gjysmat e ndeshjeve në shtëpi. Nga 11 takime, përfshirë edhe atë me Kupën ndaj Teutës, bardheblutë luajnë shtatë sfida në fushën e vet dhe vetëm katër takime si udhëtues./Panoramasport
