Ish-kryebashkiaku i Durrësit, Vangjush Dako, është nxjerrë nga qelia, pas rreth 9 muajsh, me vendim të Gjykatës së Posaçme. Ndaj Dakos, GJKKO ka caktuar masën “arrest shtëpie” me mbikëqyrje policore 24 orë, pasi kanë kaluar afatet e paraburgimit.
Rreth orës 19:00, Dako i shoqëruar nga një makinë policie la burgun e Durrësit.
Jashtë e prisnin disa familjarë të tij, të cilët e përqafuan dhe më pas makina e policisë ka vijuar drejt banesës ku ai do të qëndrojë në masën e sigurisë “arrest shtëpie” me mbikëqyrje policore.
Dako akuzohet për “Shpërdorim detyre” në dy raste në procedurën e dhënies së lejes së ndërtimit të një pallati shumëkatesh dhe shpërdorim të fondeve publike në procedurën e prokurimit për ndërtimin e një shëtitoreje në bregdet.
Vendimi i sotëm i GJKKO-së detyron Vangjush Dakon të mos largohet nga banesa e të mbikëqyret 24 orë me polici.
