Drejtuesi i Prokurorisë së Dibrës, Urim Buci u shkarkua ditën e djeshme nga Kolegji i Posaçëm i Apelimit, shkalla e dytë e vetingut, pasi nuk arrin nivelin e besueshëm në kriterin e pasurisë.
Pas këtij vendimi, Këshilli i Lartë i Prokurorisë është mbledhur me urgjencë ditën e sotme dhe ka caktuar një drejtues të përkohshëm për Prokurorinë e Dibrës. Buci është zëvendësuar në atë post nga Abaz Muça, i cili do të qëndrojë vetëm 3 muaj në krye të Prokurorisë së Dibrës.
“Këshilli i Lartë i Prokurorisë u mblodh me urgjencë ditën e sotme në orën 12:30 dhe vendosi caktimin e përkohshëm të prokurorit Abaz Muça si drejtues për një afat 3 mujor, në Prokurorinë pranë Gjykatës së Shkallës së Parë të Juridiksionit të Përgjithshëm Dibër.
Ky vendim u mor pas shkarkimit dje nga KPA-ja të drejtuesit Urim Buci.” – thuhet në njoftim.
