Personi në foto është 25-vjeçari Hysen Meta, i cili dyshohet se vrau me armë zjarri babanë e tij Pëllumb Meta në Shënavlash të Durrësit dhe e groposi trupin e të atit në bashkëpunim me motrën dhe vëllanë e tij.
Hygerta Meta 19 vjeçe, Hysen Meta 25 vjeç dhe Amarildo Meta 22 vjeç akuzohen për veprën penale “Vrasja për shkak të marrëdhënieve familjare”. Ndërkohë që është vënë nën hetim edhe bashkëshortja e viktimës, Blerina Meta, e cila po ndiqet penalisht në gjendje të lirë.
Shkaku i krimit, sipas Policisë kanë qenë konfliktet e vazhdueshme familjare, si dhe nxitja e babait që vajza e tij të fejohej me një person pa dëshirën e saj.
Sipas Policisë, vrasja ka qenë e planifikuar dhe jo si pasojë e një konflikti të çastit. Në banesë është gjetur edhe një predhë e armës së zjarrit me të cilën ishte kryer krimi. Po ashtu është sekuestruar edhe një kallashnikov, si dhe arma e krimit dhe disa veshje, të cilat do t’i nënshtrohen analizave.
Vrasja e paramenduar ka ndodhur brenda një dhome të shtëpisë dhe më pas tre fëmijët e kanë transportuar trupin e pajetë të babait të tyre duke e varrosur pranë një kasolleje në oborr.
