Policia ka arritur të gjejë armën e krimit me të cilën 19-vjeçarja Hygerta Meta vrau babain e saj, Pëllumb Meta, 50 vjeç në fshatin Shënavlash të Durrësit.
Pas dëshmisë së 19-vjeçares, arma është gjetur e hedhur në një kënetë pranë fshatit Shënavlash, e mbështjellë me qese dhe me shenja gishtërinjsh.
Autoritetet dyshojnë se basghkëpunëtorë në krim kanë qenë dhe e ëma e Hygertës, si dhe vëllai i saj. Krimi i rëndë dyshohet se ka ndodhur rreth 10 ditë më parë, por vetëm sot u arrit të zbardhej ngjarja.
Më 13 shkurt ora 22:30 kur djali i tij Hysen Meta bëri denoncimin në polici për zhdukjen e të atit. Pas hetimeve, u zbardh krimi, ku ekspertët e kriminalistikës e gjetën kufomën të zhveshur dhe të mbështjellë me plastmas.
Studentja 19-vjeçare ka pranuar krimin duke deklaruar në polici se i ati e kishte detyruar që të fejohet pa dëshirën e saj me një emigrant në Itali dhe madje ka çuar grupin hetimor drejt vendit ku ishte varrosur i ati. Por pas këtij krimi ka shumë pikëpyetje që duan përgjigje.
Trupi i Pëllumb Metës me peshë 90 kg u gjet i varrosur 70 metra në distancë nga banesa në oborr . Kjo do të thotë se transportimi i tij është i pamundur të bëhet vetëm. Po kështu viktima është mbështjellë me plasmas dhe varrosur 1.5 metra thellë çka sjell dyshime se ajo nuk ka vepruar e vetme dhe dyshohet se persona të tjerë kanë qenë bashkëpunëtorë në krim. Hetuesit po verifikojnë rolin e familjarëve të cilët janë marrë në pyetje. Gruaja e viktimës, Blerina Meta është marrë në pyetje dhe ka deklaruar se burri i saj ishte autoritar dhe ndonjëherë i dhunshëm, kur e kundërshtonin ne familje, por ka thënë se s’kishte dijeni për krimin.
Ndërkohë trupi i 50-vjeçarit është zhvarrosur dhe është transportuar në Institutin e Mjekësisë Ligjore, për kryerjen e ekspertizës së mëtejshme.
Familja ishte me origjinë nga fshati Shën Mëri i Krujës përbëhej prej 6 anëtarësh, burri, gruaja, 2 djem e 2 vajza. Viktima punonte si roje tek tregu i makinave.
