Një sasi prej 33 kg marihuanë është sekuestruar nga Policia e Kosovës mbrëmjen e kaluar në bjeshkët e fshatit Vërmicë. Lënda narkotike ishte në posedim të dy personave që dyshohet se kishin hyrë nga Shqipëria në Kosovë përmes shtigjeve malore në mënyrë të paligjshme.
Si pasojë është bërë i mundur arrestimi i njërit prej tyre, ndërsa tjetri ka mundur të arratiset.
Policia e Kosovës bën me dije se marihuana ishte e vendosur në dy çanta me 11 paketime, të cilat janë sekuestruar. Sakaq vijon puna për kapjen e personit tjetër të përfshirë në këtë veprimtari kriminale.
“Policia e Kosovës njoftoi se Sektori i Hetimeve nga Departamenti për Kufi gjatë realizimit të një plani operativ, më 22.02.2024, në bjeshkët e fshatit Vermicë ka vërejtur dy persona të dyshuar duke hyrë nga territori i Republikës së Shqipërisë në territorin e Republikës së Kosovës përmes rrugëve malore në mënyrë të paligjshme.
Personat janë vërejtur se gjatë lëvizjes, në shpinë bartnin ngarkesa të dyshuara, ku pasi kishin hyrë në zonën e Republikës së Kosovës, nga zyrtarët policor janë urdhëruar që të ndalojnë, mirëpo ata i kanë lëshuar ngarkesat që bartnin dhe kanë filluar që të ikin, por njëri nga ata është arritur të ndalohet nga ana e zyrtarëve policorë”,- thuhet në njoftimin e Policisë.
“Ngarkesa e dyshuar ndodhej në dy çanta me 11 (njëmbëdhjetë) paketime në sasi prej 33.800 kg (tridhjetë e tre kg e tetëqind gram), substancë e dyshuar narkotike e llojit marihuanë.
Lidhur me rastin është thirrur prokurori kompetent dhe dosja së bashku me substancën e dyshuar i dorëzohet Drejtorisë per Hetimin e Trafikimit me Narkotik Prizren për trajtim të mëtejshëm”- përfundon Policia.
