Nënkryetari i PD, Luçiano Boçi foli për vizitën e Blinken në Tiranë në një intervistë në Ora News. Boçi u shpreh se vizita e Blinken në Tiranë ishte një vizitë atipike ku sipas tij, mungoi eksportimi i demokracisë.
“Të themi të keqardhur do dukej e tepërt. Do thoja që ishte një vizitë e atipike në raport me vizitat e tjera të Sekretarëve të Shtetit Amerikan. Nuk transmetoi një mesazh unik që i shërben gjithë ambientit politiko-social të shoqërisë shqiptare. Pjesa e eksportimit të demokracisë, mungoi dhe madje ishte ajo pjesa që çedoi. Ky element i munguar u duk edhe në shmangien e parlamentit. Ishte vizitë atipike, nuk eci në rendin e vizitave të tjera që kanë ruajtur një lloj situate klasike. Ne jemi republikë parlamentare, dhe institucioni themelor që respektohet i pari është parlamenti. Fjala që mbart mesazhe e një sekretari e një zyrtari shtetit transmetohet nëpërmjet fjalës në parlament”, tha Boçi.
